«Լուսավոր Հայաստան» կուսակցության համագործակցության հնարավորությունները «Քաղաքացիական պայմանագիր» եւ «Հանրապետություն» կուսակցությունների հետ սպառված չեն եւ ապագայում նման համագործակցություն հնարավոր է։ Այս մասին ասյօր՝ նոյեմբերի 5-ին, լրագրողների հետ հանդիպմանն ասաց «Լուսավոր Հայաստան» կուսակցության նախագահ, 6-րդ գումարման ԱԺ պատգամավոր Էդմոն Մարուքյանը։
Նա, սակայն, նշեց՝ «Ելք» դաշինքի առաքելությունն, որպես այդպիսին, ավարտված է․ «Ելք» դաշինքը համարվում է, որ գոյություն չունի, որովհետեւ «Ելք» դաշինքը ուներ խմբակցություն ԱԺ-ում, իսկ այդ խմբակցությունը գոյություն չունի, 6-րդ գումարման Ազգային ժողովն արձակված է իրավունքի ուժով։ Չկա նաեւ «Ելք» դաշինքի խմբակցությունը Երեւանի ավագանիում, այսինքն՝ այս առումով «Ելք» դաշինքի առաքելությունն ավարտված է»։
Մարուքյանը պարզաբանեց նաեւ, թե ինչու որոշեցին առանձին մասնակցել ընտրություններին եւ պատասխանեց հարցին, թե արդյոք հիմնական պատճառը անցողիկ շեմի հարցն է եղել. «Մենք այս հարցին չենք նայել անցողիկ շեմն անցնելու տեսանկյունից, այլ ընտրական իմաստով մոբիլ լինելու առումով։ Ես կարծում եմ, որ երկու ուժերն էլ ԱԺ-ում հայտնվելու հնարավորություն ունեն նաեւ այս ֆորմատով։ Ես մտահոգություն չունեմ, որ ուժերը չեն հայտնվի ԱԺ-ում։ Եթե մենք չհայտնվենք, բա էլ ո՞վ պետք է հայտնվի»,-նշեց նա՝ հավելելով, որ «Հանրապետություն» կուսակցությունը շարունակում է իրենց գործընկերը լինել, «մենք իրար չենք լքել»։
Ավելի վաղ NEWS.am-ը հայտնել էր, որ «Հանրապետություն» կուսակցության ղեկավար Արամ Սարգսյանը չի համաձայնել արտահերթ խորհրդարանական ընտրություններին մասնակցել «Լուսավոր Հայաստան» կուսակցության ցուցակով։ «Հանրապետություն» կուսակցության անդամ Անի Խաչատրյանը NEWS.am-ին հայտնել էր. «Առաջարկը, որ Արամ Սարգսյանը մասնակցի «Լուսավոր Հայաստան» կուսակցության ցուցակով, չընդունվեց: Մեր քննարկումները դաշինքով, թե կուսակցությամբ մասնակցելու շուրջ էր, եւ մենք համոզված ենք, որ 7 տոկոսը «Լույս» դաշինքի համար շատ քիչ է, մենք այն կհաղթահարենք եւ 7-ից շատ ավելի տոկոսներ կարող ենք հավաքել։ Ես համարում եմ, որ մենք երկրորդ ուժն էինք լինելու ապագա խորհրդարանում, երեւի թե «Լուսավոր Հայաստանը» մեզ հետ համաձայն չէր։ Մենք կողմնակից էինք, որ «Լույս» դաշինքով գնանք ընտրությունների, բայց Էդմոն Մարուքյանն էլ որոշեց իր ուժերը ստուգել եւ գնաց առանձին իր կուսակցությունով»: Նա նաեւ չէր բացառել, որ արտահերթ խորհրդարանական ընտրություններին կմասնակցեն այլ դաշինքով եւ արդեն բանակցում են որոշ ուժերի հետ:
Նշենք, որ արտահերթ խորհրդարանական ընտրությունները տեղի կունենան 2018 թ.-ի դեկտեմբերի 9-ին, նախընտրական քարոզարշավը կմեկնարկի նոյեմբերի 26-ից։ Կուսակցություններն ու կուսակցությունների դաշինքները կարող են իրենց հայտերը ներկայացնել մինչեւ նոյեմբերի 14-ը, ժամը 18։00-ն։ Դրանք ԿԸՀ-ն կգրանցի մինչեւ նոյեմբերի 19-ը, ժամը 18։00-ն։ Քարոզչության ժամանակահատվածը նոյեմբերի 26-ից դեկտեմբերի 7-ն է. Ընտրական օրենսգրքով սահմանվել է 12-օրյա ժամկետ:
